توضيحات مهمة للطلبة القدامى لتفادي توقف منحتي Minhaty.ma
مع بداية الموسم الجامعي الجديد 2025/2026، تُذكّر مصلحة المنح بالرباط جميع الطلبة الجامعيين القدامى بضرورة الانتباه إلى بعض النقاط الأساسية حتى لا يتم توقيف صرف المنحة. هذه التوضيحات مهمة باش تبقى منحتك مستمرة بلا مشاكل:
إعادة التسجيل بالكلية أو المؤسسة الجامعية
حسب المذكرة الوزارية الأخيرة، الكليات والمؤسسات العليا خاصها ترسل لوائح الطلبة القدامى (سلك الإجازة) قبل 26 شتنبر 2025. هاد العملية ضرورية باش تتم معالجة الملفات وصرف الشطر الأول من المنحة في الوقت المحدد.
كيفاش كتكون إعادة التسجيل؟
- كل كلية كتفتح منصة إلكترونية خاصة بها في بداية الموسم.
- الطالب خاصو يدخل يسجل حضور السنة الجامعية الجديدة ويؤكد استمراره في الدراسة.
- بعد نهاية الآجال، الكلية كترسل اللوائح لمصلحة المنح اللي كتشوف واش الطالب مستوفٍ للشروط (الوحدات السابقة، متابعة الدراسة…) ثم كتقرر استمرار صرف المنحة.
إقرا أيصاً: التسجيل في منحتي Minhaty.ma 2025-2026
⚠️ ملاحظة:
- ماشي جميع الكليات كتطلب من الطالب يدير إعادة التسجيل بنفسو. بعض المؤسسات كيديروها أوتوماتيكياً.
- لذلك، خاصك تتأكد من إدارتك أو تسول ممثل الطلبة باش ما يضيعش عليك الوقت.
العمل خلال فترة الدراسة
أي طالب كيخدم فالقطاع العام أو الخاص خلال الفترة الدراسية من شتنبر إلى يونيو، وكيتم التصريح به في CNSS أو ANAPEC… معرض لتوقيف منحتو.
- إذا الدخل الشهري اللي خديتيه خلال هاد الفترة فاق قيمة المنحة، المنحة كتوقف مباشرة.
⚠️ استثناء:
- الخدمة خلال العطلة الصيفية (يوليوز وغشت) ما عندهاش تأثير على المنحة، تقدر تخدم عادي.
الانتقال من الجامعة إلى التكوين المهني (OFPPT) أو العكس
إذا الطالب بدل المسار ديالو (مثلاً من الكلية إلى التكوين المهني أو العكس)، فالمنحة كتتوقف خلال السنة الأولى بعد الانتقال.
- بمعنى: اللي دار سحب الباك ومشى لتخصص جديد غالباً كيضطر ينتظر حتى السنة الثانية باش ترجع ليه المنحة.
الحل المتاح هو تقديم شكاية للمديرية الجهوية المعنية بالتكوين أو التعليم، لكن غالباً المعالجة كتكون متأخرة وكتأثر على صرف المنحة فالوقت المناسب.
للاستفادة المستمرة من منحة التعليم العالي برسم الموسم 2025/2026، خاص الطلبة القدامى يركزو على:
- احترام آجال إعادة التسجيل.
- تجنب مزاولة عمل مأجور خلال فترة الدراسة إلا فالعطلة الصيفية.
- أخذ الحيطة عند تغيير المسار بين الجامعة والتكوين المهني.
هاد النقاط الثلاثة أساسية باش تضمن الاستفادة من المنحة ديالك بلا عراقيل هاد العام.
